كتب الشيوعي وليم نصار / المؤلف الموسيقي والفنان يرثي سيد المقاومة:
مقاطع من رسالة كنت قد ارسلتها للشهيد ابو هادي في العام 2009 … وانتشرت انتشارا كبيرا … وحسب ما وصلني انه قرأها … وابتسم.
—
(ليش منكش شيوعي يا حسن؟)
رفيقي يا حسن نصر الله …
شو بغار منك لأنك مش شيوعي …
شو بغار منك لأنك بتعطينا الأمل … وما بتنقعنا باليأس متل ما يأسونا بعض الشيوعيين …
شو بغار منك لمن بتطل .. وبتكون قريب للناس أكتر منا نحنا الشيوعيين .. مع إنو مفروض يكون العكس ..(هيك كانو يخبرونا إنو الشيوعي من الناس وللناس بس يبدو إنو الشيوعي الحالي من الناس بس مش للناس)..
شو بغار منك يا حسن نصر الله .. لأنك واضح .. وخليت الشيوعي والملحد يحبك أكتر ما يحب رفاقو وحزبو …
شو بغار منك لمن تقول الاشيا أبيض وأسود .. وما بتحط إجر بالفلاحة وإجر بالبور …
يا حسن …
شو بغار من العمامة السودا يلي ع راسك … وما بعرف ليش عم تخليني شوفها أجمل من بيريه غيفارا… شهيدنا الأوحد بالأدغال …
يا حسن …
شو قصتك يا رجل؟
شو سرك؟
من أي طينة بشر معجون ؟
آآآآآآآآآآآآآآآآآآآآآآآآآآآآآآآآآآخ يا حسن …… لو إنك كنت شيوعي .. كنا غيرنا هالشعوب العميا يلي ما بتعرف غير طق الحنك … والمكايد … والنضال عبر بوزات الصور والكاميرات والاشاعات.
لو كنت يا حسن شيوعي … تأكد إنو كل الشيوعيين .. المسيحيين قبل المتاولة يلي متلك كانوا هتفوا باسمك … متل ما هلق عم نهتف باسمك ..
لو كنت يا حسن شيوعي … كنا برضو حطيناك نجمة على جباهنا متل ما حاطينك شمعة مضواية بقلوبنا … ومنداريك من الهوا ومن العيون الجارحة ..
لك يا حسن …
لك إنت .. أشرف من أشرف شيوعي …
أصدق من أصدق شيوعي …
مقاوم أكثر من أكبر شيوعي طقيق حنك …
كرمال كل هودي …
أنت السيد …
أنت المعلم …
أنت الرفيق …
أنت وصية الرب يسوع لما قال (لم آت لألق سلاما بل سيفا)…
يا حسن نصر الله .. يا أخي .. يا رفيقي ..
يا سيد …
السلام لاسمك .. من الآن وإلى أبد الأبدين ..
آمين ..
💔💔💔🌹🌹🥹🥹🥹💔
وليم نصار / لبنان
مؤلف موسيقي وفنان
